“ኢትዮጵያን እናልብሳት”  /በሚራክል እውነቱ/

“ኢትዮጵያን እናልብሳት” /በሚራክል እውነቱ/

  • Post comments:0 Comments
የአረንጓዴ ልማት ጥቅሙ ለራስ ነው፤ ሰዎች የድካም ስሜት ሲሰማቸው የአእምሮ መጨናነቅ ሲያጋጥማቸው ሰውነትን ዘና ለማድረግና ንጹህ አየር ለመተንፈስ አረንጓዴና ንጹህ ቦታ ያስፈልጋል። ሕፃናት በንጹህ ቦታ ይጫወታሉ። በየሰፈሩ አረንጓዴ ቦታ ሲኖርና ልጆችም ሆኑ ሌሎች ተገናኝተው መጨዋወት ሲኖር መቀራረብ ይኖራል፤ ይሄም ያፋቅራል። የሰውነት ማጎልመሻ ስፖርት በመስራትም ጤናን መጠበቅ ይቻላል። ለዚህ ደግሞ አረንጓዴ ቦታዎችን ማስዋብና መንከባከብ ያስፈልጋል ።
 
የችግኝ ተከላው ከማንም በላይ በደን መመናመን ሳቢያ ክፉኛ እየታመመች ለምትገኘው ሀገራችን ፍቱን መድሃኒት ነው። እንደሚታወቀው የሀገራችን የደን ሽፋን ከ40 በመቶ ወደ 3 በመቶ ዝቅ ያለበት ሁኔታ ነበር። በዶ/ር ዐብይ አህመድ አነሳሽነት ህዝቡን በማስተባበር የጭግኝ ተከላና ደን ልማት ላይ ባለፉት ሶስት ዓመታት ባከናወነቻቸው ተጨባጭ ተግባሮች ይህን አሃዝ ወደ 15 በመቶ ከፍ ማድረግ ችላለች።
 
የችግኝ ተከላው ትርጉም ብዙ ነው። የኢንዱስትሪ መስፋፋት፣የደን መመናመን እና የመሳሳሉት ዓለማችንን ለካርቦን ልቀት እየዳረጓት ባለበት በዚህ ዘመን ከዚህ ችግር ለመውጣት ሁነኛው መፍትሔ የችግኝ ተከላ እንደሆነ የዘርፉ ሳይንቲስቶች ይናገራሉ። ሀገራችን ባለፉት ዓመታት በቢሊዬን የሚቆጠሩ ችግኞችን በአንድ ጀምበር በመትከል የራሷን አስተዋጾኦ ከማበርከቷም በተጨማሪ እንደ ሀገር ብቻ ሳይሆን ዓለምን ከካርቦን ልቀት ለመታደግ ለተያዘው ዓለም አቀፍ ጥረትም ጉልህ ፋይዳ አበርክታለች፡፡
 
በህብረተሰቡ ዘንድ ለዛፎች ልዩ ክብር እንደሚሰጥ ሊቃውንት ስለዛፍ ከተነገሩ ቁምነገሮች መረዳት ይቻላል፡፡ የሥነ ሕይወት ባለሙያው ፕሮፌሰር ለገሠ ነጋሽ በአንድ ወቅት ካጠናቀሩት መካከል አንደኛው እንዲህ ይላል “ሠርግ ደግስ ደስታህ ያንድ ቀን ነው፣ ተሾም ተሸለም፣ ደስታህ ያንድ ወር ነው፣ ዛፍ ትከል ደስታህ የዕድሜ ልክ ነው፡፡“ከዚህ መረዳት የሚቻለው ማህበረሰቡ ለዛፍ ያለውን በጎ አመለካከትን ነው፡፡
 
ጠ/ሚ ዶ/ር ዐብይ አህመድ በይፋዊ የፌስ ቡክ ገጻቸው እንዲህ ሲሉ መልዕክታቸውን አስተላልፈዋል፡፡ የኢትዮጵያውያን ሕይወት ከዛፎች እና ከጫካ ጋር በጥብቅ የተቆራኘ ነው፡፡ ዛሬ የ2013ን የ አረንጓዴ ዐሻራን የችግኝ ተከላ መርሐ ግብር አስጀምረናል። በ2011 የአካባቢን ብክለትና የአየር ንብረት ለውጥ የሚያስከትላቸውን ችግሮች ለመቅረፍ አስበን የአራት ዓመት ዕቅድ በማውጣት ያቀረብነው ሀገራዊ ጥሪ አንድ አካል ነው፡፡
 
በጎርፍ መጥለቅለቅ፣ የምግብ ዋስትናን ያለማረጋገጥ፣ አካባቢ ተኮር ግጭቶች እና የመሳሰሉ አሉታዊ ሁኔታዎችን የመከላከያ መንገዱ በእጃችን ነው፡፡ ለመላው ኢትዮጵያውያን “ኢትዮጵያን እናልብሳት” ብዬ ጥሪ አቀርባለሁ። ጥሪው ሀገራችንን አረንጓዴ እናልብስ፣ በክልል ፣ በጎሳ፣ በሃይማኖት፣ በጾታ ከመከፋፈል አልፈን፣ ለዚህ ታላቅ ሕዝብ በሚመጥን መልኩ፣ ኢትዮጵያችንን በብልጽግና እና በክብር በአንድነት የተፈጥሮ ልብሷን እናልብሳት በማለት መልዕክታቸውን ለኢትዮጵያዊያን አስተላልፈዋል፡
 
የጠ/ሚ ዶ/ር አብይ አህመድ የ አረንጓዴ አሻራ ብሄራዊ ጥሪ ሁሉን ገዢ ሃሳብ በመሆኑ በርካቶች ተቀባብለውታል፡፡ ከአካባቢ ፅዳትና ውበት፤ በተለይም ዓለምን እያስጨነቀ ያለውን የአየር ንብረት ለውጥን ለመቋቋም ዛፍ የመትከል ጉዳይ የሚታለፍ አይሆንም። ኢትዮጵያም የዓለምን ችግር ለመፍታት የራሷን ድርሻ እየተወጣች መሆኗ ሊያስመሰግናት ይገባል። ህዝቡም ለጠቅላይ ሚኒስትሩ ጥሪ ከዚህ ቀደም ባሉት ዓመታት እንዳሳዬው ፈጣን ምላሽ እንደሚሰጥ ይጠበቃል፡፡
 
ዛፍ መትከል የህይወት አካል መሆኑ ብዙዎችን የሚያስማማ ጉዳይ ቢሆንም ተገቢውን ትኩረት ግን አላገኘም ማለት ይቻላል። ያለ ዛፍ ምንም ነገር የለም። የችግኝ ተከላው ፋይዳ ደግሞ የወሰን ጥግ የለውም። ከሰው ልጅ ባለፈም የዱር እንስሳትና አራዊትንም ከመጥፋት ከመታደጉ በተጨማሪ የገቢ ምንጭም ነው።የአየር ንብረት ለውጥን ለመቋቋም ከተፈለገ ያለ ዛፍ አይታሰብም።
 
ሰው እንዴት የሚተነፍሰው እስኪያጣ ድረስ አካባቢውን ምድረ በዳ ያደርጋል? በእርግጥም እየሆነ ያለው ይህ ነው፡፡የሰው ልጅ ዛፍ ሊተክልና በዛፍ ሊጠቀም የተፈቀደለት ፍጡር እንጂ ፀረ- ዛፍ ይሆን ዘንድ በፍፁም አልተፈጠረም። ይህን ሁሉም ሰው ልብ ሊለው የሚገባ ጉዳይ ነው፤ለመጪው ለትውልድ ማሰብ ግዴታ ነው።
 
ጠ/ሚ ዶ/ር አብይ አህመድ በ2011 በነበረው የአረንጓዴ አሻራ ፕሮግራም ላይ እንዲህ ሲሉ ተደምጠዋል፡፡ “አረንጓዴ አሻራ ማለት ውሃው እንዳይደርቅ፣ አሣው እንዳያልቅ፣ ዋርካው እንዳይደርቅ፣ ጥላና ተፈጥሮዊ ሳንባ እንዳይከስም መንከባከብና በዘላቂነት መጠበቅ ማለት ነው” ብለዋል፡፡
 
በመጨረሻም በዚህ ዓመት በሀገር አቀፍ ደረጃ 6 ቢሊየን ችግኝ ይተከላል፡፡ስለሆነም ህብረተሰቡ በነቂስ ወጥቶ የተዘጋጁትን ችግኞች ለኮቪድ 19 አጋላጭ በማይሆን መልኩ በህብረት መትከል ይገባዋል፡፡ ከመትከል ቀጥሎ ያለው ዋናው ነገር የተከሉትን መጠበቅና ለአቅመ ዛፍ ደረጃ እስኪደርሱ መንከባከብ አስፈላጊ መሆኑን አለመዘንጋት ነው። እስከ ዛሬም ያለው ችግር የመትከል ሳይሆን የማፅደቅና ማሳደግ ጉድለት መሆኑን መረዳት ያሻል፡፡
 
ብልጽግና ፓርቲን ይምረጡ

Leave a Reply