• Post comments:0 Comments

ትናንት ኢትዮጵያን በዓለም አደባባይ ያስጠራው ጀግና ትውልድ ዛሬም ነገም አለ፡፡ በተስፋ የተሞላ ለውጥ ፈላጊ ትውልድ፡፡ ነገን በኩራት ቀና ለማለት ዛሬን አንገት ደፍቶ የሚሰራ ታታሪ ሀገር ወዳድ ትውልድ ዛሬም እንደትናንቱ አለ፡፡ ሀገር በብልጽግና ማማ ላይ ወጥታ ለማዬት የሚጓጓ ትውልድ ዛሬም አለ።

በጽንፈኞች የሀሰት ፐሮፖጋንዳና የጨለምተኝነት ጉዞ ሳይንበረከኩ፣ የዘረኝነት ጦር ቢጎዳቸውም ለቂም በቀል መነሳት ሳይሆን ከፈተናዎች ጀርባ የድል ካባን መልበስ እንደሚቻል በዚህም የኢትዮጵያና የኢትዮጵያዊነት ፍቅር በውስጡ የሚንቀለቀል ሀያል ትውልድ አለ፡፡

በየጊዜው ጫፍ በወጡ አዋቂ ነን ባዮች የሀሰት የታሪክ ትርክት ጆሮ ሳይሰጡ ዛሬም እንደትናንቱ ከልብ ከአንጀታው ወገኔ፣ወንድሜ ኑ አረፍ በሉ ብሎ መኝታውን የሚለቅ ትውልድ ዛሬም አለ፡፡ መጡብኝን ሳይሆን መጣችሁልኝን የሚያስቀድም ደግ ትውልድ ዛሬም አለ፡፡ ቋንቋ፣ዘርና ሀይማኖት ሳይገድበው ለተጎዱ ሁሉ ቀድሞ የሚደርስ ያለውን የሚያካፍል ጀግና ትውልድ ዛሬም አለ፡፡

በእጁ አጣናና ድንጋይ ሳይሆን የቀለም ብዕር የሚጨብጥ የነገዋን የበለጸገች ኢትዮጵያ አስቦ እና ናፍቆ የሚሰራ እውቀት እንደ ውሃ የተጠማ ትውልድ ዛሬም አለ፤ ኢትዮጵያዊነት ማንነት መሆኑን የተረዳ ትውልድ ዛሬም እንደትናንቱ አለ፡፡ ኢትዮጵያን ከከፍታዋ ማማ ለማውረድ የሚሹ ሀይሎችን በመመከት ደጀን መሆን የቻለ ትውልድ ዛሬም የትየለሌ ነው፡፡

አስተሳሰባቸው በሰፈር ሳይታጠሩ ከብሔርተኝነት ይልቅ ለህብረ ብሔራዊነት ቅድሚያ የሚሰጡ ኢትዮጵያዊነት መንፈስን የተላበሱ ወገን ወዳድ ትውልድ በየቀዬው ሞልቷል፡፡ ከምክንያት የለሽ ጥላቻ የተላቀቀ ለሰው ልጆች ሁሉ ክብርና ልዕልና በየሄደበት ቆሞ የሚሟገት ዜጋ ሀገሬ አፍርታለች፡፡ ለሀገሩ የችግር ጋጋታ ሳይሆን የመፍትሔ ሃሳብ አመንጪ መድሐኒት የሆነ ትውልድ ዛሬም አለ፡፡

Leave a Reply